Шеснаесетгодишната Венецуела Фјури, ќерка на славниот боксер Тајсон Фјури, направи раскошна девојачка вечер која повеќе наликуваше на гламурозен настан отколку на приватна прослава.

Младата невеста блесна во металик-златен фустан со гладијаторски детали, комбиниран со тијара и вел, додека прославата се одржа во фудбалски клуб во Моркамб. До неа постојано беше нејзината мајка, Парис Фјури, која и самата стапила во брак на млада возраст, па нејзината поддршка за ќерката не изненадува.

Венецуела се сврши уште во октомври минатата година, токму на својот 16. роденден, кога нејзиниот дечко, 17-годишниот боксер Ноа Прајс, ја побара за жена на подиум за танцување. Оттогаш, таа отворено го покажува возбудувањето за претстојната свадба, а на забавата гордо го носеше и впечатливиот дијамантски свршенички прстен.

Иако точниот датум на свадбата сè уште не е познат, сè укажува дека подготовките се во напредна фаза. На луксузната прослава присуствувале околу 300 гости, а атмосферата била исполнета со музика, танц и бројни изненадувања. Во еден момент, младоженецот ја прекршил традицијата и се појавил на забавата за да ја изненади својата избраничка.

Интересно е што овојпат таткото останал во втор план, додека семејството Фјури, познато по своите традиционални вредности, ја поддржува врската на младата двојка и покрај нивната возраст.

Мајката Парис ѝ дала и едноставен совет на ќерката пред бракот: „Важно е само да бидеш среќна“.