Добредојдовте во светот на тату артистите! Тие се уметници што со својата вештина и креативност создаваат вистински уметнички дела на вашата кожа. Тие ја користат својата вештина за да ја претворат вашата визија во реалност и да ви помогнат да ги изразите својата личност и стил. Една од нив е и Ирина Атанаскова, позната како Ина од „Нејмлес тату студио“ во Скопје.

Таа има речиси 9-годишно искуство во професионалната сфера на тетовирањето. Првото тетовирање го направила врз себе, а потоа искуство стекнувала преку клиенти на кои им изработувала тетоважи бесплатно.

„Најголем проблем или најтешко за артистите е да преминат на учење, додека да стигнат до некое ниво“, вели Ирина за „Утрински печат“.

 

По долга практика, Ирина пробала да ги истетовира и своите родители и сестрата, кои ѝ се најголема поддршка во нејзината професија како тату артист.

Во процесот на постепеното професионализирање и усовршување на тату уметноста со тогашното момче Баже, а сега сопруг, го отворија и тату студиото „Нејмлес“.  Таа за својата професија вели дека секогаш е голем предизвик.

„Најголем предизвик е да останеш мотивиран цело време во тоа што го работиш. Меѓутоа, треба да останеш дисциплиниран и да останеш доследен на тоа што го работиш и колку толку да уживаш секој ден“, вели Ирина.

Покрај тоа што приватно Ина е мајка на мало дете, таа е секогаш во форма за тетовирање. Таа вели дека не дозволува лошите денови да ѝ влијаат врз работата.
Освен што тетовира, таа е и илустратор.

Има илустрирано неколку книги, меѓу кои една е нејзино авторско дело. Нејзините колоритни илустрации во стил на водени бои веќе се дел од нејзиниот вистински печат. Нив ги имплементира од хартија на кожа. Клиентите го обожаваат нејзиниот стил.

„Клиентите веќе ме знаат во кој стил работам, така што ме одбираат и само ќе ми речат: Сакам нешто во твој стил. Ова сакам, ама нешто во твој стил да биде, да не е некаква копија од интернет…“
За нејзиниот стил на тетовирање, таа вели дека е женствен, а нејзини клиенти главно се жени.

И како мајка, таа ги поседува сите квалитети што им се потребни на нејзините клиенти: негување, поддршка и внимание.
Сепак, живееме во време кога тетовирањето сè уште се смета за нешто што не е соодветно. Иако ова се менува постепено, тетовирањето исто така може да биде причина за стигматизирање кај жените, особено во конзервативните средини.

Ирина за „Утрински печат“ вели дека тие табуа за жените и мајките што не треба да бидат тетовирани, полека се кршат…

„Повеќе работам со жени, морам да признаам… и откако станав мајка, често и се поврзувам и со мајки, и многу ми се допаѓа затоа што се крши тоа табу дека мајките не треба да бидат тетовирани“, вели таа.

Во Скопје, како и во многу други градови во светот, жените што се тату артисти и истовремено мајки може да бидат стигматизирани поради својата професија. Но, за Ирина, тоа не претставува никаков проблем… Таа вели дека, досега, никогаш немала проблеми поради својот изглед и професија.

„Може некогаш некој на улица да направи некоја фаца, или да ме праша од кај ми се тетоваживе, колку пари биле и дали болело. Меѓутоа, во мојот живот тоа не влијаело никогаш лошо“.

Целиот разговор со Ирина Атанаскова погледнете го во видеото: