ВИДЕО: Голем бод на Македонија против актуелниот европски шампион Италија
Македонската фудбалска А репрезентација на Националната арена „Тодор Проески“ во Скопје во квалификациите за ЕП 2024 одигра 1:1 против еден од фаворитите во групата „Ц“ против актуелниот европски шампион Италија.
Почетната иницијатива и поголема контрола на топката имаа нормално фаворитите на овој меч, играчите на Лучано Спалети кои веќе постигнаа гол во третата минута, но истиот беше поништен поради офсајд.
Фудбалерите на Милевски мораа да го издржат притисокот кој го вршеа Аѕурите кои имаа проблеми и со лошиот терен, на што се пожалија и пред стартот на натпреварот.
Првата убава шанса Италија ја имаше по изведен корнер, Кристанте највисоко скокна, но неговиот удар заврши покрај голот на Димитриевски.
Италија беше сè поопасна, одржуваше високо ниво на игра, а во 19 минута се најдовме во прекрасна прилика да реализираме, откако Алиоски украде една топка, силно тргна во напад, убаво го пронајде Миовски кој се закани со глава, но само покрај голот на Донарума.
Казната можеше да стигне лесно на спротивната страна, во контра беше Тонали во идеална можност да се запише во листата на стрелците, но ја погоди стативата.
Полека се ослободувавме од притисокот, сега ние настојувавме повеќе да бидеме на половината на Италијанците, првата сериозна шанса во 38 минута ја имавме преку Елмас кој шутираше од околу 20 метри, но сигурен беше Донарума.
Непосредно пред паузата во казнетиот простор се повреди голманот Димитриевски, за среќа ништо посериозно. Се заканивме и преку Миовски, но неговиот удар беше блокиран.
Манев не ја острани најдобро топката од нашиот казнет простор во 47 минута, Барела шутираше, топката удри во стативата, на одбиената топка добро реагираше Имобиле кој со глава донесе водство.
Имаше и ВАР контрола за да се провери дали е сè чисто во погодокот на гостите, главниот судија од Франција Франсоа Летексие покажа на центарот за потврдена предност на Италија.
По примениот погодок бевме свесни дека сега мора да нападнеме кон италијанскиот гол по израмнување, тоа за малку не успеа да го направи Елмас во 67 минута, но топката помина за малку покрај десната статива на Донарума.
Потоа, во 76 минута нововлезениот Димоски изнуди прекршок за слободен удар од 20 метри, но Алиоски беше блокиран. Конечно, дојдовме и ние до погодок, и тоа од слободен удар кој прекрасно го изведе Барди за 1:1.
Претходно беше фаулиран Елмас, а играчот на турскиот клуб Трабзонспор Барди од околу 20 метри, фантастично стрелаше во мрежата на еден од најдобрите голмани на светот, Џанлуиџи Донарума.
До крајот го издржавме и последниот налет на Италија која последната прилика да си оди со победа од ова гостување ја имаше преку Кристанте, но шутираше право во Димитриевски.
Квалификации ЕП 2024
Национална арена „Тодор Проески“ – Скопје, Гледачи: 28.000
Македонија – Италија 1:1 (0:0)
Барди 81` / Имобиле 47`
Македонија: Димитриевски, Муслиу (Серафимов 78`), Манев, Зајков, Алиоски, Барди, Атанасов (Иљазовски 90+1`), Елези (Алими 74`), Ашковски (Димоски 74`) , Елмас, Миовски.