Фудбалерите на Евертон пропуштија огромна шанса посериозно да се вклучат во трката за европските клупски натпреварувања, одиграа само нерешено 2:2 денеска со Кристал палас во натпреварот од 36 коло на гостински терен во Лондон во Премиер лигата, иако имаа предност двапати во натпреварот.

Доколку Евертон победеше на „Селхурст Парк“, ќе имаше ист број бодови со Брентфорд на делбата на осмото место, што на крајот би можело да води кон Европа во случај Астон Вила да го освои трофејот во Лигата на Европа, каде што ќе бидат фаворити против Фрајбург во Истанбул.

Дополнително, тогаш дури и местото што води кон Лигата на Европа не би било далеку од Евертон, а дури би имало и теоретска шанса за Лигата на шампионите. Сепак, по денешниот натпревар, сè тргна надолу за „Карамелите“, па реално е дека можат да се квалификуваат само за Лигата на Конференциите.

Евертон поведе рано во натпреварот со голот на Тарковски во шестата минута од натпреварот и сè одеше во вистинската насока. Гостите нападнаа и можеа да го зголемат водството, но потоа следеше студен туш на средина од првото полувреме. Исмаила Сар ја искористи грешката на одбраната на „Карамелите“, откако топката отскокна на неговите нозе, и ја смести во мрежата за израмнување во 34 минута.

Штом започна второто полувреме, Бето успеа да го врати Евертон во водство во 47 минута, но беше очигледно дека Палас ќе возврати. Нападите продолжија, и на крајот Матета ја искористи уште една грешка на одбраната на гостите за да израмни во 77 минута.

Се одиграа уште два меча во неделата во кои исто така немаше победник: Барнли – Астон Вила 2:2 и Нотингем – Њукасл 1:1.