ВИДЕО: „Еве го Рамбо“ – Србите се подбиваат со косовските специјалци на границата

Косовски специјалци на граничниот премин Јариње / 20 септември 2021 / фото: ТВ Клан/Јутјуб/принтскрин

Не попуштаат тензиите на граничните премини меѓу Косово и Србија, каде се распоредени десетици возила на специјалните единици на косовската полиција. Според српските медиуми, меѓу специјалците има и снајперисти со големокалибарски пушки и тие стојат лице в лице со стотици Срби од северот на Косово, кои ги блокираат граничните премини во двете насоки.

На социјалните мрежи се појавија снимки на кои се гледа како Србите се потсмеваат со косовските специјалци, упатувајќи им погрдни зборови и пораки.

Во текот на денот, бројот на Срби на граничниот премин Јариње се зголемил во однос на минатите денови, пишуваат медиумите.

Последните тензии меѓу Србија и Косово настанаа откако Приштина одлучи да не пушта возила со српски таблички да влезат во Косово и бараат нивна замена со привремени. Во општините на северот на Косово со мнозинско српско население, досега беше можно да се вози со регистерски таблички со ознаките на косовски градови, но издадени од српското Министерство за внатрешни работи, што беше спротивно на т.н. Бриселски договор на Косово и Србија за слобода на движење.

Од Приштина испратија силни полициски сили, а одлуката за табличките ја нарекоа „потег за реципроцитет“. Премиерот на Косово, Албин Курти, рече дека оваа одлука не е донесена доброволно од Косово, туку е наметната од „другата страна“.

Видео на денот