Актерот Еди Марфи е годинашниот добитник на специјалната награда „Сесил Б. Демил“ за животно дело, во рамки на доделувањето на филмските награди Златен глобус.

Марфи е познат по својот специфичен хумор, којшто е обожаван од страна на бројните обожаватели на неговите комични филмови.

Откако ја прими престижната статуетка, тој се пошегува на сметка на минатогодишниот скандал на Оскарите, кога актерот Вил Смит му удри шлаканица на својот колега Крис Рок.

„Сакам да ве известам дека постои дефинитивен план што можете да го следите за да постигнете успех, просперитет, долговечност и мир на умот. Постои план и јас го следам цела моја кариера. Многу е едноставно… Само следете ги овие три работи: плаќајте даноци, внимавајте на вашата работа и не го спомнувајте името на сопругата на Вил Смит!“, нагласи Еди Марфи, кој во приватниот живот е близок пријател со Смит.

Како потсетување, Крис Рок беше водител на минатогодишното издание на свечената церемонија на која се доделуваат филмските награди Оскар.

Во својот комичарски настап, Рок шеговито ја спомна фризурата на Џејда Смит, која страда од алопеција. Смит првично се насмеа на коментарот, но кога ја виде лутата реакција на неговата сопруга, истрча на сцената и му удри шлаканица на Рок.

Кога се врати на своето место, Вил Смит извика: „Не ставај го името на мојата сопруга во твојата е**на уста!“