Скромната куќа во лондонската општина Бромли, каде што музичката икона Дејвид Боуви ги поминал своите клучни години, наскоро ќе ги отвори вратите за јавноста. Иако однадвор изгледа како обичен дом, внатре во овие ѕидови е испишана историјата на еден од најголемите уметници на сите времиња.

Куќата на адреса „Plaistow Grove 4“, каде Боуви живеел од својата осма до дваесеттата година, моментално е во фаза на реставрација под покровителство на фондацијата „Heritage of London Trust“. Планирано е таа да биде официјално отворена за посетители во текот на 2027 година.

Враќање во шеесеттите години

Целта на проектот е на куќата да ѝ се врати автентичниот изглед од почетокот на шеесеттите години. Со помош на досега невидена архива, внатрешноста ќе биде прецизно реконструирана за да се долови амбиентот во кој младиот Дејвид се трансформирал од „обичен ученик од предградието“ во светска музичка ѕвезда.

Боуви своевремено ја опишал својата детска соба, помала од девет квадратни метри, како неговиот „цел свет“.

„Поминував толку многу време во мојата спална соба, тоа навистина беше мојот свет. Горе ги имав моите книги, музиката, грамофонот … Тоа беше моето засолниште“, изјавил своевремено музичарот.

Инспирација за новите генерации

Наместо класичен музеј, куќата е замислена како место за креативност. Таму ќе се одржуваат работилници за млади луѓе, со надеж дека неговиот дом ќе послужи како инспирација за нови уметници.

Џорџ Андервуд, големиот пријател на Боуви, се присети на нивните заеднички почетоци токму во таа куќа:

„Неверојатно е што неговата музика промени толку многу животи ширум светот, а сè започна токму тука, во оваа мала соба“.