Не сум оптеретен околу тоа дали да се кандидирам за нов мандат или не. Насочен сум кон се она што сум го ветил, колку што може да се стигне, бидејќи пола од мандатот ќе помине во време на пандемија. Опциите се отворени, и за градоначалничко место, но и за повисока функција, изјави во Утрински брифинг, градоначалникот на општина Карпош, Стефан Богоев.

„Имам желба да ги менувам работите на подобро. Имам прилично искуство собрано, желба, елан и верба“, додаде Богоев. „Во разговорите со стручните служби во општината и со градежните компании, се уште постои простор за инвестирање, но мојата визија како градоначалник на Карпош заедно со градоначалникот на Скопје е дека градот генерално треба да се шири кон север, бидејќи на југ е парк шумата Водно и неа треба да ја штитиме. Северен дел во општина Карпош е касарната Илинден и моментално документациски обезбедени се сите предуслови за пренасочување на масовната урбанизација во тој дел. Тоа значи дека ќе се намали притисокот врз одреден дел од општината и ќе се отвори фронт во друг дел“, смета Богоев.

„Има луѓе кои имаат средства и решаваат да инвестираат во недвижности, но добар дел се должи и на внатрешната миграција, што е случај и во другите држави. Претпоставувам дека импакт имаат и новите измени во делот „купи куќа, купи стан“, така што мислам дека целиот склоп на околности допринесува до ова што се случува сега“, вели Богоев. „Во делови како касарната Илинден или Зајчев рид логично е да има инвестиции и развој. Градежништвото движи и други гранки во економијата. Она што е не логично и јас како член на ЗЕЛС се трудам и имам поддршка од претседателот е тоа општините доминатно да се финансираат од такси за уредување на градежно земјиште, попознати како комуналии кои се плаќаат при градба на куќа или зграда, бидејќи тоа ја диктира понатамошната политика. Никаде на запад не се финансираат доминантно локалните самоуправи од овие такси, туку од поголеми ставки од стабилните приходи, а тоа се даноците“, смета Богоев и додава дека не се работи за зголемување на даноците туку за поголем дел од данокот кој веќе се плаќа да оди во општините.

Целиот разговор со градоначалникот на општина Карпош, Стефан Богоев, погледнете го во видеото: