Барселона ефикасно одговори на убедливата победа на Реал над Елче (4:1), Каталонците ја победија Севиља со 5:2 и ја вратија предноста од четири бода пред својот најголем ривал на 10 кола до крајот на сезоната во Ла Лига.

По бледата игра против Њукасл на Сент Џејмс Парк и ремито (1:1), на играчите на Барса им беше потребна убедлива победа за да ја зголемат самодовербата.

Сè беше брзо решено, бидејќи Рафиња реализираше пенали во деветтата и 21 минута, пред Дани Олмо да постигне гол за 3:0 во 38 минута.

Хоакин Мартинез Гауна, попознат по прекарот Осо, намали во судиското продолжение во првото полувреме, пред Рафиња во 51 и Жоао Кансело во 60 минута да го зголемат водството на 5:1 и да обезбедат убедлив триумф. Севиља постигна уште еден гол, овој пат преку Џибрил Соу.

Рафиња беше заменет во 82 минута од Гави, кој се врати на теренот по 204 дена.