Астронаутката Кристина Кох, членка на екипажот на мисијата Артемис 2, која минатиот петок се врати на Земјата, откри како само десет дена поминати во вселената можат да влијаат врз човечкото тело, пренесува „Унилад“.

Кох, една од четворицата астронаути кои учествуваа во летот околу Месечината, на социјалните мрежи сподели видео кое го прикажува нејзиното напорно опоравување и повторно прилагодување на земјината гравитација.

На видеото кое го објави 47-годишната астронаутка, воедно и прва жена која летала околу Месечината, се гледа како се обидува да оди по права линија, но очигледно има потешкотии со одржување рамнотежа. Иако членовите на екипажот секојдневно вежбале по 30 минути, враќањето во земјината гравитација претставува голем предизвик. Кох им објасни на своите следбеници зошто опоравувањето трае подолго, а притоа и се пошегува:

„Изгледа дека со враќањето на сурфањето ќе морам уште малку да почекам.“

Снимката јасно покажува дека нејзиното тело сè уште се прилагодува на условите на Земјата.

„Кога луѓето престојуваат во микрогравитација, системите во нашето тело што еволуирале за да му даваат информации на мозокот за движењето, односно нашите вестибуларни органи, не функционираат како што треба“, објасни Кох.

Таа додаде дека човечкото тело всушност се приспособува на новите услови.

„Нашиот мозок со текот на времето научи да ги игнорира тие сигнали. Затоа по враќањето во гравитација на почетокот многу повеќе се потпираме на видот за да се снајдеме во просторот. Да се оди така што едната нога точно се става пред другата, дури и со затворени очи, може да биде вистински предизвик.“

Податоците собрани за време на опоравувањето на астронаутите не придонесуваат само за подобро разбирање на животот во вселената, туку имаат и практична примена на Земјата. Кох истакна дека „разбирањето на овие процеси може да помогне во лекување на вртоглавица, потрес на мозокот и други неуровестибуларни нарушувања“.

Таа ги увери следбениците дека нејзиното несигурно одење е нормален дел од рехабилитацијата.

„За среќа, веќе добро се прилагодуваме на гравитацијата, седум дена по слетувањето“, порача таа.

Освен што донесе вредни научни податоци, мисијата Артемис 2 силно одекна во јавноста и повторно го разбуди интересот за истражување на Месечината. На конференција за новинари, Кох седеше заедно со своите колеги од екипажот Рејд Вајзман, Виктор Гловер и Џереми Хансен и го истакна поширокото значење на мисијата.

„Не можам доволно да нагласам колку тоа ни значеше“, рече таа. „Тоа ни беше подеднакво важно како и исполнувањето на техничките цели. Сакавме да бидеме тука за нашите колеги од НАСА и да ја направиме оваа мисија важна за целиот свет“.