Пет партии – „Единствена Русија”, Комунистичката партија на Руската Федерација, Либерално – демократската партија, „Праведна Русија – за вистината” и „Нови луѓе” влегуваат во Државната дума по обработката на 40 отсто од гласовите, покажуваат податоците на Централната изборна комисија на Русија.

Конечниот одѕив на тридневните парламентарни избори ќе биде објавен денеска, кој е многу низок во однос на претходните избори.

„Единствена Русија” освои 45,54 отсто од гласовите за партиските листи, а нејзините кандидати освоија 193 од 225 места.

На второ место е Комунистичката партија на Руската Федерација, која доби 21,66 отсто од гласовите. Нејзините кандидати водат во 16 изборни единици
Немаше значајно присуство на опозицијата на изборите, бидејќи организациите поврзани со затворениот Алексеј Навални, најсилниот критичар на Кремљ, беа прогласени за екстремистички.

Гласањето беше обележано и со бројни извештаи за нерегуларности, вклучително и полнење на гласачките ливчиња во гласачките кутии. Eдинствена Русија, која во моментов има 334 од 450 пратеници во Думата, се обидува да го задржи супер мнозинството што овозможува промена на уставот. Сепак, партијата е длабоко непопуларна и истражувањата на независните анкети покажуваат дека нејзиниот рејтинг е најнизок во последните две децении откако е основана.

На последното национално гласање во 2016 година, „Единствена Русија“ освои нешто повеќе од 54 проценти од гласовите.

На оваа и на другите актуелни теми од регионот и светот во видео анализата на денешен Утрински брифинг.