Министерството за надворешни работи на Велика Британија соопшти дека активно работи на смирување на ситуацијата на северот на Косово и дека го поздравува договорот на Приштина со ЕУ за следните чекори за деескалација, пишува Албанската пошта.

„Активно работиме со партнерите за деескалација на тензиите на северот на Косово и за охрабрување на враќање на дијалогот со посредство на ЕУ за да се обезбеди конечен и траен договор за нормализација меѓу Србија и Косово“, се вели во соопштението на британското Министерство за надворешни работи.

Министерот за надворешни работи Џејмс Клеверли, како што соопшти британското МНР, оваа порака му ја пренел на косовскиот премиер Албин Курти при посетата на Курти на Лондон на 26 јуни.

„Секретарот за надворешни работи минатиот месец ја истакна оваа порака до премиерот Курти на Косово и до премиерката Брнабиќ на Србија. Го поздравуваме договорот на Косово со ЕУ за следните чекори за деескалација, како што најави премиерот Курти на 12 јули“, беше соопштено.

Планот на ЕУ од три точки предвидува повлекување на елитните косовски полициски единици од околината на општинските згради на северот, повлекување на новите албански градоначалници од општинските згради, распишување предвремени избори во четири општини и гаранција дека локалните Срби ќе учествуваат на изборите.