Во вчерашната програма од англиската Премиер лига беа одиграни четири натпревари и сите четири завршија со идентичен резултат што е несекојдневен и историски случај во најсилната лига во светот.

Програмата започна во 15 часот со три средби. Брајтон славеше против Нотингем форест, Манчестер јунајтед беше подобар од Кристал палас, а Фулам го совлада Тотенхем. Заедничко за сите овие дуели беше тоа што завршија со резултат 2:1. Шлагот на тортата го донесе најголемото лондонско дерби меѓу Арсенал и Челси, кое исто така заврши со резултат 2:1.

Според новинарот Ендру Бисли, вакво нешто досега не се случило во историјата на Премиер лигата.

„Ова е првпат во историјата на Премиер лигата да се одиграат најмалку четири натпревари во ист ден и сите да завршат со ист резултат“, наведе Бисли.

Everything you need to know from Sunday’s action, including BIG wins for @Arsenal and @ManUtd 👇

— Premier League (@premierleague) March 1, 2026

Далечната 1995 година, пет од осум натпревари во Премиер лигата завршиле со 1:1, но никогаш претходно сите одиграни дуели во ист ден, а кога биле најмалку четири не завршиле со идентичен исход.

По ова коло, Арсенал продолжува да го брка шампионскиот трофеј во Англија и има пет бода повеќе од второпласираниот Манчестер сити, но и натпревар повеќе. Голем чекор кон пласман во Лигата на шампионите направи и Манчестер јунајтед, кој сега има шест бода предност во однос на позициите што не водат во најелитното европско клупско натпреварување.