Јавен обвинител од Основното јавно обвинителство Скопје спроведе истрага против скопјанец осомничен за обид за убиство на сопствениот брат. Според информациите, тој со дрвена ногарка го претепал братот и го оставил да крвави.

„На 18 октомври, во семејниот дом во Марино, осомничениот се обидел да го убие сопствениот брат, удирајќи го со дрвена ногарка по главата и по целото тело. Од ударите, оштетениот започнал да крвари од главата и изгубил свест, а осомничениот, наместо да му помогне, си легнал да спие. Следниот ден, кога се разбудил, видел дека брат му лежи во крв и без свест, но повторно го оставил и повикал медицинска помош дури речиси три часа подоцна“, соопшти Обвинителството.

Имајќи ги предвид сите околности, јавниот обвинител до судијата на претходна постапка од Основниот кривичен суд Скопје доставил предлог за определување мерка притвор за осомничениот, додаваат од ОЈО.