Уставниот суд информира дека не е поведена постапка за линеарните покачувања на пензиите во два наврати од по 2.500 денари, но не го споменува линеарното зголемување од 1.000 денари кое важеше за септемриската пензија, исплатена на први октомври, две недели пред првиот круг од локалните избори.

„Судот информира дека нема да ги преиспитува одредбите кои го опфаќаат зголемувањето на пензиите по 2500 денари (исплатени во септември 2024 и март 2025 година) бидејќи на седницата која се одржа на 19 ноември Судот ја отфрли иницијативата за преиспитување на членовите 3 и 18 кои го регулираа тоа прашање, поради фактот што истите беа од темпорален карактер и не се повеќе дел од правниот промет“, соопштија од Уставниот суд.

Што ќе се случува со веќе исплатената илјадарка и со линеарното покашување што треба да се случи во март наредната година, ќе зависи од нивната одлука по поведената постапка.

„Уставниот суд информира дека не е донесена конечна одлука за предметот У.бр.13/2025, за членот 2 од Законот за изменување и дополнување на Законот за пензиското и инвалидското осигурување со кој се зголемуваат пензиите (во јавноста познато како линеарно зголемување). Судот укажува дека на 24. седница одржана на 19.11.2025 година со мнозинство гласови, изрази сомнеж во уставноста на членот 2 од Законот. Во тек е втората фаза од постапката во која се бараат мислења од доносителот и од предлагачите на Законот, по што ќе следува конечна одлука. Јавноста ќе биде известена кога овој предмет ќе биде ставен на седница за гласање“, соопштија од Уставниот суд.