Шестата самостојна изложба на Лазе Трипков со наслов „Pефлексии на новата реалност“ се осврнува кон приоритетните проблеми на новото време. Опкружувањето со информации поврзани со пандемијата и вирусот ковид-19 сите не присили да ги ограничиме социјалните потреби, а секојдневието полека да ни станува „дигитално“.

За време на карантинот во април 2020, Трипков го почна својот визуелен проект под наслов „Изолациско расположение – креативни рефлексии“, кој привлече сериозно внимание дома, како и пошироко. Сите плакати или визуелни размислувања, кои од 19 октомври се изложени во галерискиот простор на „Мала станица“, се лична рефлексија и се одраз на лични доживувања.

Доминираат пејзажите, а има и многу колажи и колажни експресии, кои имаат за цел да го манифестираат ставот на Трипков кон изолацијата и дополнитeлно да помогнат во артикулацијата на неговиот личен развој како визуелен уметник.

– Преку оваа изложба/проект ќе се обидам да иницирам дуел меѓу уметноста во галеријата (галерија како физички простор) и галеријата во виртуелна реалност (виртуелен галериски простор). Посетителот има директна можност покрај изложените плакати и сам да управува со содржината на делата. Преку посебно креирана платформа за виртуелна реалност, со помош на виар-технологија секој ќе може да нурне во моите визуелни рефлексии, да ги обликува и да раководи со содржината, да ја модифицира, користејќи ги постојните форми од плакатите – истакнува Трипков.

Изложбата има трансмедијален карактер што поттикнува технолошка и директна интеракција на посетителот и авторот, преку неговите дела, а интензивирано преку виар-технологијата.

Изложбата е поддржана од Министерството за култура и неколку приватни компании и поединци. Куратор на проектот е Ана Франговска, а соработник за виар-технологија е Трајко Митревски.

Авторот Лазе Трипков е вонреден професор на Факултетот за уметност и дизајн на Меѓународниот Балкански универзитет во Скопје. Основач е на „Плакарт“ и „Скопје постер фестивал“.

(Текстот е објавен во „Културен печат“ број 102, во печатеното издание на весникот „Слободен печат“ на 23-24 октомври 2021)