„Ренџ Роверот“ на Шекил О’Нил, вреден околу 165.000 евра, кој беше специјално дизајниран за да може кошаркарската легенда висока 216 сантиметри удобно да седи зад воланот, исчезна, пишува „Пејџ сикс“.

Извори веруваат дека кражбата се случила по хакерски напад врз транспортната компанија која била одговорна за транспорт на возилото. Компанијата која работела на прилагодување на автомобилот сега нуди награда за каква било информација што ќе доведе до негово пронаоѓање.

Сосема новиот автомобил беше во процес на прилагодување во „Ефортлес Моторс“, а се очекуваше вредноста на возилото да се зголеми на околу 257.000 евра откако ќе бидат завршени работите.

Компанијата организираше автомобилот да биде испратен од Атланта до Луизијана. Возилото беше подигнато во понеделник, на 20 октомври, но никогаш не пристигна на својата дестинација. Кога „Ефортлес Моторс“ го контактираше превозникот за да ја провери состојбата на пратката, дознаа дека автомобилот исчезнал на патот.

Се верува дека крадците го хакирале системот на транспортната компанија за да добијат пристап до податоците за подигнување и испорака. Тие ги искористиле овие информации за да ја пресретнат пратката и да го пренасочат автомобилот на Шек во непознат правец. „Ефортлес моторс“ соопшти дека нуди награда од 8.500 евра за информации или враќање на возилото.

Шек соработува со полицијата во потрагата по неговиот црн, персонализиран теренец. Шек е познат како страствен љубител на автомобили, а неговата колекција се проценува на вредност до 3,5 милиони евра. Вклучува модели како што се Ferrari 355 F1 Spider, Bentley Azure, Lamborghini Gallardo и Vaydor од 2018 година, од кои многу се специјално прилагодени на неговата висина.

Познатиот кошаркар еднаш рече дека поседува 40 автомобили. Се чини дека сега поседува 39. Полицијата сè уште не го коментирала случајот.