Творецот на популарниот стрип пронајден мртов во море: На телото имал гризнувања од ајкула
Јапонскиот уметник Казуки Такахаши, авторот на популарната манга серијал „Yu-Gi-Oh!“ е пронајден мртов.
Јапонскиот манга уметник, имаше 60 години, а неговото безживотно тело беше пронајдено во средата наутро на брегот на градот Наго, Окинава. Такахаши носел опрема за нуркање.
Едно лице од брод што поминувал ја повикал јапонската поморска служба за да пријави тело што плови на 300 метри од брегот во близина на туристичкиот град Наго.
Крајбрежната стража ги истражува причините за смртта, јавуваат јапонските медиуми.
Kazuki Takahashi, creator of ‘Yu-Gi-Oh’, has sadly passed away at the age of 60. pic.twitter.com/9jl3lSWj5N
— DiscussingFilm (@DiscussingFilm) July 7, 2022
Такахаши патувал сам за Окинава, а компанијата за изнајмување автомобили контактирала со полицијата во средата навечер, велејќи дека не можат да стапат во контакт со него, што ја навело крајбрежната стража да се посомнева дека пронајденото тело е негово.
Властите соопштија дека тој имал повреди на стомакот и долниот дел од телото, кои се чини дека биле предизвикани од каснувања од ајкула или други морски суштества.
Делата на Такахаши се многу популарни во Јапонија и во странство, а неговата манга е претворена во телевизиски серии, филмови и игри со карти.
Својата цртачка кариера ја започнал во 1982 година со стрипот „Токио но Така“. Неколку години подоцна, во 1990 година, тој ја објавил мангата „Тененшоку Данџи Бурај“, која траела две години. Во 1996 година почнал да работи на својата најпозната комична и анимирана серија „Ју-ги-о!“.
Гинисовата книга на рекорди во 2011 година ја прогласила „Ју-ги-о!“ за најпродавана игра со карти во светот, со повеќе од 25,17 милијарди продадени комплети ширум светот.