Комисијата за наградата „Роман на годината“ за 2025 година, што ја доделува Фондацијата за унапредување и промоција на културните вредности „Славко Јаневски“, во состав Калина Малеска (минатогодишна лауреатка и претседателка на жирито), Иван Антоновски, Ивана Трајаноска, Иван Шопов и Катерина Богоева (претставничка на Фондацијата), во втората селекција одбра 11 романи што останаа во конкуренција за оваа престижна награда.

На годинашниот конкурс пристигнаа дури 46 романи. Жири-комисијата во првата селекција одбра 22 наслова, а сега списокот го стесни на 11 романи.

Втората селекција на конкурсот за наградата „Роман на годината“ за 2025 година ја поминаа: „Александар јава на запад“, Венко Андоновски, „Три“; „Тринаесеттиот“, Лидија Димковска, „Три“; „Необјавен фељтон“, Владимир Илиевски, „Maкедоника литера“; „Илина и тајните на Бабин заб“, Хана Корнети, „Или – или“; „11 проверени начини како да ја заебеш љубовта: (роман во раскази)“, Драгана Лукан Николоски, „Чудна шума“; „Зара Зарина“, Лилјана Пандева, „ПНВ публикации“; „Кривата Дијана: (роман за верижната вина)“, Фросина Пармаковска, „Арс Либрис“; „Фобос: деконструиран роман“, Соња Станковска, „Или – или“; „Три Марии (роман-басма), Оливера Ќорвезироска, „Арс Либрис; „Само уште еден скок“, Енис Хилми, „Светулка нова“; и „Повратник со две лица“, Ивица Челиковиќ, „Паблишер“.

Според пропозициите, насловот на наградениот роман и името на авторот ќе бидат соопштени на прес-конференција на 13 март, што ќе се одржи во просториите на Друштвото на писателите на Македонија во Скопје.

Наградата, чиј генерален покровител е Комерцијална банка АД Скопје, а исто така е поддржана и од Министерството за култура и туризам на Република Северна Македонија, годинава се доделува 27-ми пат. Таа се состои од плакета, уникатна статуетка и паричен износ од 150.000 денари.