Тринаесет телефони и еден лаптоп биле најдени во ќелијата во затворот во Шутка кај обвинетиот Џеваир Камбери, поранешен службеник во Министерството за економија обвинет за кочанската трагедија. Ова на денешното рочиште го откри судијката Диана Груевска Илиевска која го опомена Камбери откако за ова добила известување од управата на затворот.

Камбери, кој е единствен што освен за главното кривично дело тешки дела против општата сигурност е обвинет и за поткуп при издавањето на лиценцата за „Пулс“, рече дека телефоните ги нашол во ќелијата.

Во исчекување обвинетите да кажат дали се чувствуваат виновни – Продолжува судењето за кочанската трагедија

Камбери доби опомена, но судијката рече дека за ова следуваат и санкции како самица и други мерки што може да ги преземе управата на затворот.

Обвинителството пак вели дека со оглед на тоа дека има повеќе вакви случаи, побара да не поминуваат само со опомени.

Во тек е третото рочиште за трагедијата во дискотеката „Пулс“ каде што загинаа 63 млади луѓе. Претставникот на агенцијата за обезбедување „Рубикон“ побара за фирмата која е обвинета во судскиот процес да биде определен претставник по службена должност. Оваа одлука била донесена непосредно пред рочиштето.