Во судницата во Идризово со бројно полициско обезбедување треба да продолжи судењето за трагедијата во кочанската дискотека Пулс во која имаше 63 жртви.

Дел од обвинетите уште рано утрово се носат со бројни полициски комбиња, а тука се и дел од блиските на загинатата, но во помал број во споредба со претходните рочишта.

Откако минатото рочиште беше одложено, денеска се очекува обвинетите да кажат дали се чувствуват виновни за кривичното дело што им се става на товар, а нивната одбрана да почне со воведни зборови.

Со оглед на големиот број на обвинети, не може прецизно да се предвиди како ќе тече рочиштето. За трагедијата обвинети се 35 физички и три правни лица, а меѓу првообвинетите се сопственикот на дискотеката, неговиот син, брат, но и поранешни градоначалници на Кочани, министри и директори.