Претседателот на Соединетите Американски Држави, Доналд Трамп изјави дека земјата „го има најмоќното оружје на светот“, поради што, како што оцени, кинескиот претседател Си Џинпинг нема да дозволи ескалација на трговската војна меѓу двете земји.

Трамп рече дека „не е загрижен“ за понатамошната ескалација на економскиот конфликт со Кина, нарекувајќи го кинескиот претседател Си Џинпинг „еден од (малкуте) многу паметни луѓе во светот“, пишува Newsweek.

– Мислам дека не би дозволил тоа да се случи. САД се многу помоќни отколку што мислат луѓето. Имаме оружје кое никој не знае што е и тоа е најмоќното оружје на светот – рече Трамп.

Кина најави дека ќе воведе царини од 84 отсто за сите производи од САД, со што дополнително ќе ја зголеми претходно објавената царина од 34 отсто, а исто така поднесе нова жалба до Светската трговска организација (СТО).

Тоа беше одлучено како одговор на претходната мерка на администрацијата на Трамп, која воведе царини од 125 отсто за кинески стоки.