Американскиот претседател Доналд Трамп не даде јасен одговор на прашањето од „Волстрит џурнал“ дали федералните агенти на ИЦЕ постапиле правилно кога отвориле оган и го убиле 37-годишниот Алекс Прети во Минеаполис. Наместо тоа, американскиот претседател рече само дека „го истражуваме тоа, разгледуваме сè и ќе дојдеме до заклучок“.

Сепак, тој не избегна да биде подиректен во врска со пиштолот што Прети го имал со себе, велејќи „Не сакам пукање. Не ми се допаѓа. Но, исто така не ми се допаѓа некој што оди на демонстрации со многу моќен, целосно наполнет пиштол со два полни шаржери. Ни тоа не е добро“.

Американскиот претседател, исто така, се обиде да сигнализира за неговата намера да ги повлече агентите на ИЦЕ од Минеаполис.

„Во одреден момент ќе заминеме. Го направивме тоа, тие завршија одлична работа“, изјави тој за ВСЈ.

Во исто време, сепак, Ен-би-си објави дека Трамп размислува да го активира Законот за бунт за Минеаполис. Според функционерот цитиран од американската мрежа, американскиот претседател планира да продолжи да „бара“ соработка меѓу локалните и федералните органи за спроведување на законот „дури и повеќе отколку што веќе бараше“ во последните денови.

Претседателот верува дека „единствената причина зошто се случува овој хаос и овие трагични ситуации е тоа што локалното население одби да соработува со федералната влада и го охрабри отпорот, создавајќи исклучително тешки услови за дејствување на органите за спроведување на законот“.

Законот за бунт му дава на американскиот претседател овластување да распореди воени сили или да федерализира сили на Националната гарда во САД за справување со домашните востанија.

ВИДЕО | Федералните агенти убија човек на улица во Минеаполис – второ фатално пукање месецов