Со приближувањето на Светско првенство во фудбал, сè погласни стануваат и контроверзните потези на американската администрација, предводена од Доналд Трамп, кои предизвикуваат бурни реакции во спортската јавност.

Најновата идеја што циркулира во Вашингтон веќе наиде на остри критики кај љубителите на фудбалот ширум светот. Според најавите, навивачите од пет африкански земји: Алжир, Сенегал, Зеленортски Острови, Брегот на Слоновата Коска и Тунис би можеле да се соочат со сериозна финансиска бариера доколку сакаат во живо да ги бодрат своите репрезентации.

Имено, се разгледува можноста за воведување депозит од дури 15.000 долари, кој овие фанови би требало да го уплатат како гаранција за влез во САД за време на турнирот. Образложението на властите е дека ваквиот чекор би служел како превенција од евентуално нелегално останување во земјата по завршувањето на првенството.

Иако мерката сè уште не е официјално донесена, самата најава веќе отвори дебата за дискриминација и селективен пристап, што дополнително го подгрева незадоволството меѓу навивачите и спортската јавност.

Ќе потсетиме, Мундијалот во САД, Канада и Мексико почнува на 11 јуни и ќе трае до 19 јули.