Голема трагедија ги потресе жителите на белградската населба Борча, каде синоќа жена падна од тераса и почина на самото место додека се тепале поранешниот и сегашниот нејзин партнер, пренесува српски Телеграф.

Полицијата во Борча го уапсила Дејан З. (52) поради семејно насилство, дознава „Телеграф.рс“.

Неофицијално, тој синоќа дошол кај својата поранешна партнерка Веселинка С. и почнал да се расправа со неа. Во еден момент се појавил сегашниот партнер на жената и по низа навреди меѓу мажите, започнала физичка пресметка. Во општиот метеж, Веселинка паднала од терасата висока четири метри и починала на самото место.

По наредба на Вишото јавно обвинителство во Белград, наредена е обдукција.

Припадници на полицијата и итните служби веднаш излегле на местото на настанот, но лекарот можел само да констатира смрт на жената. Телото е испратено на обдукција за да се утврди точната причина за смртта.

Истрагата е во тек, а надлежните органи работат на расветлување на сите околности на овој трагичен настан.