Тематски фокус на 11. Викенд на гордоста е мноштвото квир-теории и историографии
Единаесеттото издание на Викенд на гордоста – Скопје ќе се одржи од 1 до 13 јуни на три локации низ Скопје: Музејот на современа уметност, МКЦ и КСП „Центар-Јадро“.
Викенд на гордоста е Фестивал за квир култура, уметност и теорија што создава простор за промоција на ненормативните форми на светообразување, односно, на односите, афектите, идентитетските позиции, телесните стилови и сензибилитетите што од хетеронормативниот, националистички и неолиберален капиталистички контекст се обележани како квир, ексцентрични и неуспешни.
Тематскиот фокус на фестивалот оваа година е „Квир-хронополитики: Историја, афекти, утопии“. Изданието ги адресира мноштвото квир-теории и историографии што го ставаат прашањето на времето и историјата во центарот на своите иследувања.
Во посебен фокус на фестивалот е преиспитувањето на хегемониските националистички и историографски наративи, како и политиките на националните архиви, нивните стратегии на бришење, исклучување и игнорирање на невидливите и тајните истории на сексуалните и родовите малцинства и нивните искуства, како и можностите за ревизија, преисчитување, преиспишување и презамислување на историските (отсутни) траги, гласови и ефемерните архиви на квир-луѓето.
Токму затоа изборот на програмата произлегува од посветеноста на идејата дека „естетското“ е суштински вкоренето во телесното искуство, кое како такво се наоѓа во основата на општествените, културните и политичките искуства. Куратор на фестивалот Викенд на гордоста – Скопје e Славчо Димитров.
Фестивалот ќе биде отворен на 1 јуни, во 20.30 часот, во МСУ, со изложбата „Сеќавајќи се на иднините“ (Remembering Futures) на познатиот полски интердисциплинарен уметник Карол Раѓишевски. Тој е познат по неговата уметничка практика што вклучува уникатни алатки при уредување на материјалите, комбинирањето на факти со фантазија, компонирањето на документи од парчиња сеќавање и прикажувањето на неочекувани алтернативни траги на сеќавањата.
На изложбата ќе бидат претставени неговата мултидисциплинарна и архивска практика преку периодичниот фанзин „Дик“, кој тој го издавал и уредувал, и проектот „Каи“, што ја претставува параинституцијата Институт за квир-архиви, која ја основал. Освен тоа, ќе биде прикажана монументалната серија „Галерија на портрети“ (2020 – во тек), серијата „Сида“ (2012 – во тек) презентирана преку стратегија на спојување на архивски материјали со гестови на апропријација, изложени во форма на принтови, слики и тапети, клучното негово дело „Зумбул“ (2019-2020) и филмовите „Кишленд“ (Kiseiland, 2012) и „Мојот драг пријател од Советскиот Сојуз“ (Mon chéri Soviétique, 2021).
Веќе следниот ден, на 2 јуни во МСУ ќе се одржи најновиот перформанс „Осуденик“ (Goner) на едно од најатрактивните имиња во современата кореографска и танцова практика Малик Нашад Шарпе (ОК).
Кореографката и перформанс уметница со чилеанско и шведско потекло, Ширли Харти Убила, на 3 јуни во МКЦ ќе го изведе делото „Абјектот на желбата“ (Abject of Desire), а на 4 јуни во МСУ познатата философка, теоретичарка и уметница Марина Гржиниќ (Словенија) ќе го одржи предавањето „Панкот и поранешната југословенска ЛГБТКИА+ заедница во Словенија и пошироко: Распетлувањето на сексот и политиката во расниот капитализам“.
Уметникот Јован Јосифовски на 8 јуни ќе има отворање на неговата самостојна изложба „Еластично насилство“, додека на 9 јуни во МСУ фантастичното трио „Стим рум“ (Steam room) во состав Александар Георгиев, Жана Пенчева и Дарио Барето Дамас ќе го изведат танцовиот и кореографски концепт за вечноста, нивниот последен дел од кореографската трилогија „dragON – dragON forever“.
Фестивалот се затвора на 13 јуни во МКЦ со Румена Бужаровска и Ана Василева од „ПичПрич“, кои ќе ја модерираат Вечерта на раскажување на квир приказни – „Срамота!“, по што ќе следува диџеј сет на Ивана Драгшиќ. Дизајнот на постерот за фестивалот е на Игор Делов.
(Текстот е објавен во „Културен печат“ број 180, во печатеното издание на весникот „Слободен печат“ на 27-28.5.2023)