Во рамки на јубилејното 45. издание на манифестацијата „Скопско лето“, на 17 јули, во 20:30 часот, во Куќата на ДЛУМ (Илинденска бр. 63) ќе биде отворена изложба на Друштвото на ликовни уметници на Македонија, насловена „Скопски урбани приказни“. Куратори на изложбата се Уметничкиот совет на ДЛУМ и Маја Чанкуловска Михајловска.

Уметниците Ана Ивановска, Доротеј Нешковски, Шќипе Мехмети, Сашо Блажес, Марина Лешкова, Давор Кешкец и Сокол Марковски, преку различни медиуми и инакви перцепции ќе ги претстават своите толкувања за „домот“ не само како физички димензионирана структура, туку и како (ин)директно чувство на припадност, опуштеност и сигурност, како простор кој ја дефинира идентитетската определба, утопијата, реалноста.

– Базирајќи ја идејата на годинешното издание на „Скопски урбани приказни“ врз поимот „дом“, почетните асоцијации сугерираат директна врска со конкретниот простор – куќата во која после седум и пол децениско работење е сместено Друштвото на ликовните уметници на Македонија.

Еманирајќи од познатата сентенца на нобеловецот Нагиб Махфуз – ’Домот не е каде што си роден, домот е каде што сите твои обиди за бегство престануваат‘, премисата ’дом‘ како место, живеалиште или засолниште, е проширена на повеќе слоеви на исчитување, но и чувствување. Во повеќето толкувања, кои можат да се и антагонистички, присутни се следните моменти: флуктуација на домот – (не)статичноста на просторот каде се поврзуваат и интерконектираат минатото со сегашноста и иднината, (не)постојаноста или (не)променливоста на истиот, реалноста и имагинацијата, присуството и отсуството…

Домот како (не)постоечки реален или апстрактен простор на поврзување со личните, семејните или општествените фрагменти и референци, но и пошироките наративи (како што е примерот за ’неистражената‘ историја на ’новиот‘ дом на ДЛУМ) е простор на интимни доживувања, но и поттикнувач на критичка корелација со политиките на заедницата и општеството, вклучително и глобалните миграциски политики и кризи – напиша Маја Чанкуловска Михајловска во својата рецензија за изложбата.