Театар Комедија премиерно ќе ја изведе претставата „Ревизор“
Театар Комедија ја најави премиерата на претставата „Ревизор“ од Гогољ за 5 мај, во 20 часот. Режијата и адаптацијата на драмскиот текст е на Андреј Цветановски.
Според режисерот Цветановски, „Ревизор“ зборува за малограѓанштината не како географска одредница, туку како состојба на духот. Зборува за стравот од нешто повисоко и за расипаноста на оние кои го обожуваат врховното божество, власта.
Гротеска на односот на граѓаните кон власта и нивната заслепеност од сјајниот костум на Петербург. Оваа претстава зборува за човековиот страв од власта и потребата од моќ кои како појави се појавуваат во овој систем и го јадат одвнатре до точка од која нема враќање.
Сценограф на претставата е Сергеј Светозарев, а костимите се на Ивана Каранфиловска.
Во претставата играат Тони Денковски, Сергеј Димоски, Виктор Арсов, Жаклина Стевковска Дрнасин, Жаклина Петровска Милјановска, Едмонд Сотир, Илија Илиоски, Столе Мицов, Јаков Спасов, Ангела Стојановска, Марија Кондовска и Христијан Поп Симонов.