Денеска фудбалерите на актуелниот есенски шампион Вардар во рамките од 19 коло во Првата македонска лига на ФФМ комплексот „Петар Милошевски“ во Скопје од 13.00 часот како домаќин ќе го пречекаат Башкими.

По двете стартни победи во пролетниот дел од сезоната против Арсими и Работнички, играчите на Вардар посакуваат и трета радост.

Секако тоа, мора да се заработи на терен, со добра игра, ефикасност и цврстина во одбраната онака како што беше и во претходните две кола.

Скопските „црвено-црни“ се ефикасни пролетва со постигнати осум гола, а примени само еден во два мечеви.

– Да, добро го започнавме пролетниот дел од сезоната, и тоа секако дека ни годи. Сепак, никако не смееме да помислиме дека нештата за нас ќе одат лесно. Кога си играч на Вардар, секој меч значи битка и тоа вистинска затоа што секој противник дава максимум против нас. Нема дилеми тука. Така ќе биде и денеска. Башкими е незгоден на негов терен, но и на гостински. Знае оваа екипа и тоа како да одигра добро, но од друга страна ние сме подготвени. Знаеме што треба да направиме за да стигнеме до нова победа и три бода пролетва во шампионатот – изјави Давор Талески, чуварот на мрежата на Вардар.

Моментно на табелата Вардар е првопласиран со 48 бодови, додека Башкими е на петтата позиција со 26.