Светската здравствена организација (СЗО) предупреди дека обемот на епидемијата на ебола во Демократска Република Конго може да биде два до четири пати поголем од официјалните проценки, но рече дека е постигнат напредок во откривањето нови случаи, јави Ал Џезира.

„Нашите проекции проценуваат дека обемот на епидемијата е најмалку два до четири пати поголем од бројот на пријавени случаи“, изјави Чикве Ихеквеазу, раководител на Програмата за здравствени итни случаи на СЗО, пред новинарите, додавајќи дека способноста на организацијата да „открива нови случаи се зголемува и подобрува секој ден“.

Тој, исто така, нагласи дека СЗО добила помалку од половина од средствата потребни за борба против епидемијата на ебола во Демократска Република Конго и ги повика донаторите да не ја напуштаат земјата во критична фаза од епидемијата.

Светската здравствена организација доби околу 40 проценти од 115-те милиони долари што ги побара за искоренување на сојот „бундибугио“, за кој не постои докажан третман или вакцина. Владините бројки покажуваат дека досега се заразени најмалку 1.926 лица, а има 702 смртни случаи од болеста.

„Оваа епидемија бара ресурси соодветни на обемот на проблемот со кој се соочуваме. И тоа не е товар што ДР Конго може сам да го носи“, рече Ихеквеазу.

Тој рече дека одговорот на ситуацијата достигна критична точка и дека се потребни зголемени напори за откривање и изолирање на пациентите откако случаите се проширија во две нови провинции оваа недела.

„Малку е како маратон. Не можете да се откажете по првата или втората рунда. Само треба да продолжите да се борите дури и кога сте уморни и исцрпени“, нагласи тој.