Присуството на Минхенската безбедносна конференција, премиерот Христијан Мицкоски го искористи и за работни средби со европски гиганти. Тој објави дека се сретнал со менаџментот на германскиот гигант „Шварц груп“, под чија капа работат светски познатите брендови „Лидл“ и „Кауфланд“, како и со унгарската компанија „Фор-ај-џи“.

Со „Шварц груп“ , премиерот информираше дека разговарале за нивните планови за инвестиции, отворање нови работни места и за модернизација на трговскиот сектор во нашата земја.

„Ги отвораме вратите за домашните компании да ги пласираат своите производи во големите европски синџири. Продолжуваме да разговараме и да привлекуваме реномирани светски компании кои веруваат во потенцијалот на нашата држава“, напиша Мицкоски на Фејсбук.

Фирмата „Оне Македонија телекомуникации“ на унгарската компанија „Фор-ај-џи“ неодамна беше избрана за најповолен понудувач на тендерот за избор на трет мобилен оператор во земјава.

„Разговаравме за пакет од 100 милиони евра инвестиции, освен во телефонијата и во сферата на вештачката интелигенција и енергетиката“, информираше Мицкоски.