Светската трговска организација (СТО) прогнозира дека надворешно-трговската размена меѓу САД и Кина би можела да се намали за 80 отсто поради влошувањето на односите, односно падот на трговската размена да изнесува 466 милијарди долари, јави Би-би-си. Минатата година надворешно-трговската размена меѓу двете земји изнесуваше 582,5 милијарди долари.

Претседателот на СТО, Нгози Оконџо-Ивеала предупреди во изјавата дека однесувањето „око за око“ на двете најголеми светски економии ќе има пошироки импликации и може сериозно да ѝ наштети на светската економија, бидејќи заедно сочинуваат три проценти од глобалната трговија. Таа посочи дека глобалната поделеност околу овие две најголеми економии може да доведе до долгорочен пад на реалниот глобален БДП за речиси седум проценти и нагласи дека во конфликт меѓу двете економски велесили, најмногу ќе настрадаат посиромашните земји, кои се поранливи на нарушувања во глобалната трговија.

Минатата недела 166 членки на СТО побараа од организацијата да направи повеќе во почитувањето на правилата на глобалната трговија, пренесува FoNet.