Атлетскиот сојуз на Србија соопшти дека атлетичарот Иван Гарај е суспендиран по позитивен допинг тест, откако самиот признал употреба на кокаин.

Според информациите од соопштението, Гарај навел дека кокаинот го користел надвор од натпреварувачки период и дека тоа не било поврзано со подобрување на спортските перформанси. Тој признал дека на 23 февруари годинава, за време на приватна забава, консумирал пет дози кокаин во комбинација со 12 пива, што било потврдено и од сведок присутен на настанот.

Поради прекршувањето, српскиот атлетичар доби суспензија во траење од три месеци, а санкцијата официјално започнала да важи од 20 март.

Гарај настапува во дисциплините фрлање ѓуле и фрлање диск, а зад себе има и значајни резултати на домашната и меѓународната сцена. Неговиот најголем успех е бронзениот медал од Светското дворанско првенство во Белград, додека минатата година го освои второто место на Купот на Србија во Крушевац.