Лидерот на средношколскиот сојуз Бленди Ходаи,денеска се обрати пред Влада пред присутните средношколци, наставници, но и родители кои протестираат против настава на далечина.

– Да се образоваме правилно, точно и добро. Денеска сме собрани сите и наставници и родители и ученици за да го изразиме револтот од одлуката образовниот процес да продолжи онлајн. За нас оваа одлука е скандалозна. Пандемијата покажа колку е значајно образованието во едно општество. За Владата не се проблем преполните плажи и кафулиња, каде луѓето ги кршат мерките за заштита од Ковид, но проблем и е отворање на училиштата. Не сите семејства имаат услови за да им обезбедат онлајн учење на децата. Или донесете одлука за настава со физичко присуство или ќе се видиме на бојкот и помасовни протести – порача Ходаи пред Влада.

Детската амбасада Меѓаши денеска преку соопштение изрази поддршка на напорите на средношколците да бидат слушнати и вклучени во донесувањето одлуки поврзани со начините на изведување настава во учебната 2020/2021 година.

-Детскиот и младинскиот активизам, како вашиот денешен протест, се од централна важност за овој процес. Детската амбасада Меѓаши бара од надлежните во државата да ги земат предвид вашите барања при донесувањето на конечната одлука којашто ќе биде во најдобар интерес на сите вас, истакнаа од Меѓаши.