Началникот на Генералштабот на Армијата, Сашко Лафчиски, за време на работната посета на Вооружените сили на САД оствари средба со заменик-претседавачот на Здружениот Генералштаб на САД, генерал Кристофер Махони, во Пентагон во Вашингтон.

На средбата, како што соопшти Армијата, се разговарало и за актуелните глобални безбедносни предизвици, со посебен осврт на влошената состојба на Блискиот Исток, како и за потребата од континуирана адаптација на армиските капацитети и зајакнување на регионалната и меѓународната соработка во справувањето со современите закани.

Македонија и САД го потврдиле тридецениското партнерство и соработка меѓу двете армии. Лафчиски ја нагласил посветеноста на македонската армија кон регионалната и глобалната безбедност, посочувајќи го учеството на македонските војници во мировни мисии и активности на НАТО, вклучително и во мисијата „Форвард ленд форсес“ во Бугарија, Романија и во Летонија.

Во разговорите се зборувало и за процесот на модернизација на армијата, кој, според Лафчиски, е најголем во нејзината историја.

ФОТО | Шефот на Алијансата со порака до Македонија: Во НАТО никој не е сам, ги штитиме нашите сојузници

Тој го информирал Махони за опремувањето со нови лесни оклопни возила „Страјкер“ и „Џеј-ел ТВ“, како и за набавката на современи хаубици и друга воена опрема.

Притоа била истакната и претстојната вежба „Блесок 26“, која има за цел да ја оцени борбената готовност на Лесната пешадиска баталјонска група.

Посебно внимание било посветено и на развојот на Воениот полигон „Криволак“, кој беше посочен како стратешки капацитет за изведување обуки и воени вежби од големи размери.

Според соопштението, постојат планови за дополнително унапредување на инфраструктурата и модернизација на полигонот со цел проширување на неговите можности.

Муцунски е во посета на САД, МНР ќе извести кога ќе заврши настанот