Министерот за надворешни работи и надворешна трговија, Тимчо Муцунски е во повеќедневна посета на САД, но не се знае конкретно на каков и кој настан присуствува, ниту пак до кога ќе биде таму.

Министерството за надворешни работи не ја најави посетата, но на прашање на „Слободен печат“ одговори дека министерот Муцунски во Соединетите Американски Држави учествува на економско-инвестициски настан организиран од Светскиот економски форум.

„Учеството е по покана и опфаќа селектирана мрежа на актуелни и поранешни шефови на влади, министри и високи носители на одлуки во најголемите светски корпорации.

По завршувањето на настанот, Министерството за надворешни работи и надворешна трговија ќе ја информира јавноста“, ни одговорија кусо од МНР.

Сепак, не добивме одговор на прашањето до кога ќе биде таму, а не се знае ни кога заминал. Неофицијално, Муцунски не бил во Скопје најмалку од 1 март, бидејќи на седницата на Советот за безбедност што ја свика претседателката Гордана Сиљановска-Давкова министерот се обратил преку видео-бим.