Француската полиција спречи бомбашки напад пред зградата на Банката на Америка во Париз и приведе едно лице, соопштија властите, пренесува Ле Монд.

Инцидентот се случил рано утринава кога полицајците забележале двајца осомничени како носат торба за пазарење во близина на зградата на банката.

Еден од осомничените, кој држел запалка, се обидувал да го активира уредот, објави Скај Њуз, а другиот осомничен успеал да избега.

Париската полиција одбила да коментира за случајот. Националното обвинителство за борба против тероризмот отвори истрага под сомнение за кривични дела поврзани со тероризам.

„Сета чест за брзата интервенција на полициската единица на префектурата во Париз, која спречи насилен чин од терористичка природа во Париз во текот на ноќта. Будноста останува на многу високо ниво. Ги пофалувам сите безбедносни и разузнавачки служби, кои се целосно мобилизирани под моја надлежност, во сегашниот меѓународен контекст,“ изјави францускиот министер за внатрешни работи Лоран Нуњез.