Стриминг платформата за музика „Спотифај“ ги зголеми цените за своите премиум услуги во неколку земји, a известување за новите цени добија и корисниците од Македонија. Индивидуалниот план кој чинеше пет евра, од септември ќе чини 5,5 евра, дуо пакетот ќе чини 7,5 евра, семејниот 9 евра, а студентскиот план ќе чини три евра. Овој потег на Спотифај доаѓа откако компанијата за слушање музика објави дека сака да ја зголеми профитабилноста во неизвесната економија.

„Спотифај“ ги зголеми цените и во САД, Велика Британија и Австралија. За разлика од Македонија, во овие земји значително повисоко е зголемувањето на премиум пакетите. Па така, во САД индивидуалниот пакет сега започнува од 10,99 долари, дуо услугата од 14,99 долари, а семејната услуга од 16,99 долари. За студентите услугата ќе биде 5,99 долари.

„Спотифај“ ја зголеми цената на премиум услугите во неколку земји

Музичката платформа Спотифај во Македонија е достапна од 2020 година. Според податоците од Start.iо, активни се 31,678 корисници, а најголем број или 37,1 отсто од корисниците во Македонија се во возрасната група од 18 до 24 години. Месечно, спотифај има 515 милиони активни слушатели, од кои 210 милиони се премиум претплатници.