Полските кошаркари ги победија сите три меча во групата и од првото место одат во главната рунда. За второто место во А групата во директен дуел ќе одлучуваат домаќинот на шампионатот Кина и Венецуела. Овој меч почнува од 14.00 часот.

Беа убедливи против Брегот на Слоновата коска, иако после првото полувреме предноста беше само „плус четири“ (36:32) за Полјаците. Вашински беше прв стрелец со 16 поени, два помалку забележа Кулиг, а во африканската селекција се истакна Абуо (23 поени).

Во натпревар без значење Ангола по едно продолжение триумфираше над Филипини (84:81, 73:73), а во групата Д за првото место ќе играат Србија и Италија од 13.30 часот.

Нигерија во групата Б беше убедлива против Јужна Кореја (108:66) на „крилјата“ на Ерик кој забележа 17 поени, а најнеизвесно беше на дуелот од групата Ц помеѓу Порторико и Тунис.

Последната четвртина беше решавачка кога Порториканците забележаа триумф од 67:64, а прв стрелец во победничките редови беше Балкман со 14 поени.