Македонскиот голман Столе Димитриевски денеска го продолжи договорот со Валенсија до 2028 година, а веднаш потоа даде и интервју за клупскиот сајт.

Димитриевски не го криеше задоволството од продолжувањето на соработката.

„Многу сум среќен и горд што можам да објавам дека го продолжив договорот со Валенсија за уште две години. Немав никакви дилеми околу тоа. Отсекогаш сакав да останам тука и бев целосно фокусиран на тоа, бидејќи сум навистина среќен во клубот и со сè што претставува Валенсија.Секогаш се трудам да го дадам најдоброто од себе. Свесен сум колку е голема Валенсија, какви луѓе има и што значи овој клуб. Кога дојдов во Шпанија, секогаш велев дека сакам да бранам за голем клуб, а Валенсија е еден од најголемите. Пресреќен сум што останувам и понатаму. Уживам секој ден на тренинзите, на натпреварите и во одбраната на овие бои.“

Во финишот македонскиот голман бранеше во одлична форма, па поради тоа и малку жали што дојде крај на сезоната.

„Жал ми е што првенството заврши бидејќи се чувствував добро и бев во одлична форма. Не ги остваривме целите што ги посакувавме, но пред нас е нова сезона во која мора да бидеме посилни и подобро подготвени за да ги исполниме нашите амбиции.“

Зборуваше Димитриевски и за репрезентацијата на Македонија.

„Многу е тешко да се избори пласман на Светско првенство преку европските квалификации. Мора да се биде прв во групата, а и баражот е исклучително тежок. Најважно е да се стане по секој неуспех и да се продолжи понатаму. Верувам дека пред мене има уште едно или две Светски првенства и ќе се обидам со сите сили да стигнам до таму. Како и со Валенсија, така и со Македонија, мора постојано да напредуваме и да се стремиме кон поголеми цели.“

ВИДЕО | Петте најдобри одбрани на Димитриевски оваа сезона – затоа Валенсија сака да го задржи