Со наездата на рецепти на инстаграм „reels“, човек кој сака да готви неминовно ќе се инспирира. А слободните денови и продолжените викенди со дожд беа комплетно исполнети со храна, мезиња, готвење и откривање нови рецепти.

Периодов следам  една германска фуд-блогерка, која прави интересни и брзи рецепти, а последно што ми фати око беа прженици од компир. Во оригинал се викаат rosti или hash browns, популарни во Америка како дел од фастфуд културата. А кој не сака пржен компир? Знаев дека ќерка ми ќе биде воодушевена од ваква мала „частенка“ за вечера. И не погрешив 🙂

Чистејќи го фрижидерот во понеделникот, сфатив дека имам три компира што омекнале и веднаш се фатив да ги правам пржениците од компир.

Потребни состојки:

• 3 компири со средна големина
• 3 лажици лебни трошки
• 3 лажици брашно
• Сол, бибер, зачини по желба – јас ставив лук во прав. Дава поинаков шмек.

Подготовка:

Компирите изрендајте ги на крупната страна од рендето и исцедете ги во кујнска крпа, да бидат сосема суви. Ставете ги во длабок сад и додадете ги лебните трошки, брашното и зачините. Добро мешајте и потоа со рака замесете малку леплива смеса. Со намрсени раце со масло, формирајте плескавички и пржете ги во масло на среден оган. Немојте да ги пржите на силно, ќе ви изгорат, а внатре ќе ви останат живи. Не прашувајте како знам 🙂

Се служат со што сакате – павлака, мајонез, кечап… Се јадат брзо, а најубави се додека се топли.

Јас ги послужив со сос од павлака со копар.

Уживајте!