Со благослов на епископот антаниски г. Партениј, коњаницата го продолжи „Патот на црешовото топче”

Групата коњаници, членови на здружението „Бигорски манастир – Патот на црешовото топче” по добиениот благослов од епископ антаниски г. Партениј, од познатиот Бигоски манастир, денеска го продолжија патот кон Крушево.

– Со благослов на нашиот старец и игумен, епископ антаниски г. Партениј, групата млади родољубиви комити, предводени од војвотката Рашела Мизрахи, пристигна вчера во манастирот, а денеска зеде молитвено учество во светата богослужба. По завршувањето на молебниот канон кон свети Јован Крстител, комитите-коњаници: Христијан Мојсовски, Гоце Сековски, Јован Мазароски, Петар Мазароски, Роберт Милески, Стефан Ѓурчиновски, Владо Богдановски, Иван Цветковски, Адам Бекаши и Александар Крстески и примениот молитвен благослов од нашето монашко братство за нивниот претстоен коњанички марш, го продолжија пататот за Крушево, вели отец Кирил од Бигорскот манастир.

Додава дека подготвеноста да се жртвува дури и сопствениот живот во името на нашата света вера, за ближните и за татковината, била една од главните одлики на нашите богољубиви и слободољубиви предци.

-Евангелскиот дух на себеодрекување во полза на општото добро и на слободата, моќно ги вхадновувал нивните борби и подвизи, до таа мера што тие, согласно зборовите Христови, ја полагале душата своја за своите ближни. Блескавата илинденска историја, која е историја на херојски страданија, натчовечки подвиг, но и на нескршлива вера, љубов и духовна победа, е најјасен показател за тоа применето Евангелие во свештеното минато на нашиот народ. Затоа, секој современ Македонец треба со чувство на долг и благодарност, благоговејно да ја приклони својата глава пред бесмртното дело на оние кои и тогаш, но и во поново време, со својата крв го напоија преслаткиот плод на слободата, од кој денес ние се насладуваме, посочува отец Кирил.

Благодарствено сеќавајќи се на тие бесмртни Илинденци и на сите нивни сродници по дух, нагласува тој,Свештената Бигорска Обител по единаесетти пат беше домаќин на илинденската манифестација „Бигорски манастир – Патот на црешовото топче”.

Според него, на овој свечен чин претседателот на здружението „Бигорски манастир – Патот на црешовото топче”, Манојил Јаковлески, се обратил до присутните со пригодно слово и упатил посебна благодарност кон г. Партениј и братството за неуморната родољубива дејност и несебичната поддршка за остварување на манифестацијата „Патот на Црешовото топче”.

Коњицата вчера тргна од Гостивар, каде на плоштадот беше пречекана и испратена од стотина граѓани. По единаесетти пат ќе помине по рутата долга околу 200 километри, поточно патот по кој било пренесено првото црешово топче како поддршка на востаниците, а кое било израбоено токму во Бигорскиот манастир.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот