Низ продавниците во Скопје деновиве може да се забележат само мали количини на говедско месо. Во еден од маркетите велат дека им останало само уште едно парче телешко месо од бут по цена од 750 денари за килограм, додека од друг, пак, велат дека се уште имаат одредена залиха на говедско месо со цени од околу 450 денари за килограм.

Во продавниците не можеше да се види ниту увезеното свежо пилешко месо. Македонските производители ги задоволуват домашните потреби со свежо свинско месо, а поголем дел од говедското и пилешкото се увезува.

Дел од тргвоците со кои контактиравме велат дека не стигнале камионите за да ги дополнат залихите од месо. Друга причина поради која месото го снемува во продавниците е и тоа што граѓаните, во паниката од коронавирусот, масовно се снабдуваат со залихи и ги празнат рафтовите во маркетите.

Слободен печат се обрати до Групацијата за месо во Стопанската комора со цел да дознаеме каква е состојбата со месото и дали постои можност да останеме без пилешко и говедско, но одговор се уште чекаме.