Неодамна, во издание на „ПНВ Публикации“, излезе поетската книга „Слобода А“ на Ана Голејшка Џикова, трета по ред во нејзиниот опус.

Рецензент на книгата е поетесата Снежана Стојчевска, која за делото напиша: „Како калеидоскопски слики пред нас минуваат песните во кои може да ја видиме Ана како бунтовничка, млада љубовничка, да посведочиме како љубовта создава живот, како тој живот расте, се раѓа и станува живот сам за себе, независен, а сепак зависен и сврзан. Исполнета истовремено со љубов и страв од неизвесност, судрена од реални проблеми и притисоци под кои сите сме натиснати, живот во пандемија, во пропаганди и хистерија и кои повторно ја будат бунтовничката во Ана, онаа која што единствено може да живее од и за слободата.“

За создавањето на книгата, пак, Ана Голејшка Џикова ќе каже: „Песните и воопшто, збирката, се моето нурнување длабоко во себе и излез надвор, како од длабока, нејасна вода. Ова е поезија за личната трансформација и живот во и вон – телесните размислувања и доживувања – како човек, тело, душа и крајно, како жена што создава.“

(Текстот е објавен во „Културен печат“ број 138, во печатеното издание на весникот „Слободен печат“ на 23-24 јули 2022)