Уметничка слика од Клод Моне е продадена за речиси 35 милиони долари на аукција во средата вечерта, соопштија од аукциската куќа „Сотби“, означувајќи силен почеток на пролетната продажба на уметнички дела во Њујорк.

„Сотби“ и ривалската аукциска куќа „Кристи“ ја започнаа својата пролетна аукциска сезона во понеделникот. Иако глобалниот пазар на уметност стагнираше минатата година, брзата продажба во Лондон и Париз поттикна оптимизам за 2024 година.

Уметничката слика „Стог сено крај Живерни“ на францускиот модернист Клод Моне, насликана во 1893 година, е продадена за 34,8 милиони долари по жестоко наддавање.

Истовремено, британско-мексиканската уметница Леонора Карингтон го сруши сопствениот рекорд на аукција со делото „Дистракциите на Дагоберт“, кое беше продадено за 28,5 милиони долари. Овој рекорд ја стави Карингтон меѓу првите пет највредни женски уметници на аукција, велат од „Сотби“.

Инаку, „Кристи“ продаде современа уметност во вредност од околу 115 милиони долари претходната вечер, вклучувајќи слика на Жан-Мишел Баскија за 32 милиони долари.

Војната во Украина доведе до пад на бројот на руски купувачи, така што продажбата на аукциски уметнички дела ширум светот падна на 14,9 милијарди долари минатата година, во споредба со 16 милијарди долари во 2022 година.