Слем-серијал онлајн: „Коронаслем 9“ со македонски слемерки и слемери
Македонските слемерки Елена Пренџова, Цветанка Колева и Марија Грубор (насловна фотографија) и слемерите Игор Трпчески – Трпче и Горазд Китановски – Кени на 22 мај настапија на регионалниот онлајн слем-настан „Коронаслем 9“. Станува збор за слем-серијал што се одржува секој петок во исто време и кој во живо се стримува на Јутјуб.
Серијалот го организира повеќекратниот хрватски национален слем-победник Дино Тременс, кој секоја недела претставува по неколку слем-имиња од екс-ју регионот. По претставувањето на хрватските, српските и словенечките слемерки и слемери, деветтата епизода од серијалот беше посветена на најпретставителните македонски слемерки и слемери.
Елена Пренџова е една од водечките слемерки во земјава, првенката на слемот во Македонија и соорганизаторка на националниот слем, што секоја година се одржува во Прилеп. На тој настан се избира националниот претставник, кој секоја година ја претставува Македонија на Европското слем-првенство. Игор Трпче е организатор на националниот слем и двократен негов победник.
Марија Грубор беше македонска претставничка на Европскиот слем за 2018 година, а Колева на натпреварувачките слемови освојува први и втори места, а кога не настапува, е една од членките на слем-жирито. Горазд Кени е млад слемер во најава со маркантни настапи и изграден стил под влијание на најсовремените текови на рапот и перформативната поезија.
(Текстот е објавен во „Културен печат“ број 32, во печатеното издание на „Слободен печат“ на 23-25 мај 2020)