Скршен череп, крварење во мозокот и скршени ребра имало двегодишното девојче од Кичево претепано до смрт од таткото
Скршен череп, крварење во мозокот и скршеници на две ребра имало двегодишното девојче од Кичево што беше претепано до смрт од таткото. Основното јавно обвинителство Кичево донесе Наредба за спрoведување истражна постапка против него за кривично дело убиство предвидено во член 123 став 2 точка 2 во врска со став 1 од Кривичниот законик. На таткото што ја претепал до смрт сопствената 2-годишна ќерка му се заканува затвор од 10 години до доживотен затвор.
Осомничениот 29-годишник, на 18 декември, при вршење семејно насилство, ја лишил од живот сопствената ќерка родена 2022 година. Тој и нанел повеќе удари со раце и нозе, предизвикувајќи и тешки телесни повреди – скршена коска на черепот, крварење во мозокот и скршеници на две ребра. Од здобиените повреди детето починало на 8 јануари, во Клиничкиот центар „Мајка Тереза“ во Скопје.
Јавниот обвинител до судијата на пртетходна постапка достави предлог за определување мерка притвор за осомниченото лице.
„Слободен печат“ од полициски извори дознава зошто апсењето не се случило веднаш туку после 22 дена и откако девојчето било починато. Според нашите извори, мајката првично во полиција дала исказ дека девојчето паднало од височина, од мебел, односно од шкаф. Потоа девојчето било однесено во болницата во Кичево, од каде на полицијата не ѝ биле дадени информации дека се работи за претепување. Дури откако стигнале резултатите од обдукцијата, станало јасно дека се работи за претепување.