Скопје колинг 2023 по највисоки светски критериуми: „Лајбах“ ќе го отворат, Нина Кравиц ќе го затвори фестивалот
На Стадионот на АРМ во Скопје в петок, 7 јули, ќе се одржи еден од најурбаните музички фестивали кај нас, Скопје колинг 2023, кој повторно ќе понуди импресивна листа на изведувачи. Како што најавија организаторите на фестивалот, „Авалон продукција“, на вчерашната прес-конференција одржана во Скопје, годинава фестивалот продукциски ќе ги задоволи највисоките светски критериуми, а ќе настапат Нина Кравиц, „Лајбах“, Констракта и Земја Грува, „Буч Кесиди“ и „Ниплпипл“.
Сопственикот на „Авалон продукција“, Бобан Милошески изјави дека фестивалот е настроен кон „меинстрим“ генерацијата, прилагоден за публика од 7 до 70 години.
– Со оглед на тоа што фестивалот е сепак авангарден и не е ултракомерцијален, ние сме неверејотно, позитивно изненадени од бројот на посетители кои ќе се појават в петок. „Лајбах“ ќе настапат први во 21:15 часот, а единствен услов беше да биде стемнето, затоа што имаат импреивно осветлување и видео. Останатиот „лајнап“ е прилагоден спрема музичкиот концепт на фестивалот, односно како ќе се загрева атмосферата, сѐ до настапот на Нина Кравиц – изјави Бобан Милошески.