Неколку граѓани денеска се капеа на реката Треска во близина на кањонот Матка, традиционално за празникот Богојаваление – Водици.

Денеска на кањонот Матка се измерени 4.9 степени температура во водата, но на скопјани тоа не им пречеше да си ја испочитуваат традицијата. Повеќето се капеа околу една минута, но еден човек остана околу 4-5 минути во студената река која во зимскиот период е најчиста.

На Матка не се фрлаше крстот како во другите реки во Македонија, а оние кои се искапеа рекоа дека секоја година избираат мирно место, подалеку од гужвите кои се типични на Водици.

„Ако не мислиш на тоа, не е студено. Секоја година се капам на Матка за здравје и додека можам ќе ја одржувам традицијата“, рече човекот кој остана најдолго во реката.

Кањонот Матка го нарекуваат и мала Света гора поради големиот број цркви и манастири. Тој нуди можности за пливање, кајакарење, но и за алпинистичко искачување по стрмните карпи.

Во рамките на кањонот се наоѓа спелеолошкиот парк „Јовица Гроздановски“, наречен според трагично загинатиот алпинист. Паркот е составен од три пештери: Врело, Убава и Крштана како и една подводна пештера која се вика Подврело.

ФОТО+ВИДЕО | Бог се јави, навистина се јави! – Скопје го одбележа Водици