Независниот пратеник Скендер Реџепи ќе гласа само за разрешување на министерот за здравство Беким Сали, но не и за другите министри и заменици министри.

„Јас ќе гласам за разрешувањето на министерот за здравство. Без сомнение бидејќи најголемото зло што им е направено на структурите на Алтернатива, е недостатокот на политичка волја. За другите министри никогаш нема да гласам да се разрешат“, рече Реџепи во гостување на ТВ21.

Тој најави и дека ќе побара средба со премиерот Димитар Ковачевски за да разговара за меѓунардна истрага за случаите „Монструм“, „Диво насеље“, „Алфа“ и „Малиот Алмир“.

Според Реџепи, Алтернатива никогаш не побарала од Владата меѓунардна истрага за како што вели, монтираните случаи, кои беа главна точка од договорот за владина коалиција меѓу Алтернатива и СДСМ.

Тој упати остри критики кон лидерот на Алтернатива, Африм Гаши и министерот за здравство, Беким Сали.

Реџепи вели дека не може само за Министерството за здравство да се „изгори“ цела Алтернатива.

„Сега сите министри и директори треба да бидат политички егзекутирани затоа што роднина на вашиот клан не успеа да опстане на политичката сцена“, вели Реџепи.